काठमाडौं । नेपालमा पोको (POCO) ब्रान्डका स्मार्टफोन प्रयोगकर्ताहरूलाई लक्षित गर्दै ललितपुरको सानेपामा नयाँ आधिकारिक सर्भिस सेन्टर सञ्चालनमा आएको छ। रमेश कर्प (Ramesh Corp) अन्तर्गतको आधिकारिक कम्पनी टेलिटक प्रालि (Tele Talk Pvt. Ltd.) ले सानेपास्थित रमेश कम्प्लेक्समा उक्त अत्याधुनिक सर्भिस सेन्टर सञ्चालनमा ल्याएको हो।

कम्पनीका अनुसार, यस नयाँ सर्भिस सेन्टरमार्फत पोको ब्रान्डका स्मार्टफोन तथा सम्बन्धित अन्य डिभाइसहरूको आधिकारिक ‘बिक्रीपछिको सेवा’ (After-sales Service) र सम्पूर्ण प्राविधिक सहयोग उपलब्ध गराइनेछ।

स्मार्टफोन बजारमा प्रविधिको प्रयोग तीव्र रूपमा बढिरहेको सन्दर्भमा गुणस्तरीय मर्मतसम्भारको मागलाई मध्यनजर गर्दै यो सेन्टर सञ्चालनमा ल्याइएको कम्पनीले जनाएको छ। सहज पहुँचयुक्त स्थानमा स्थापना गरिएको यस केन्द्रले ग्राहकहरूलाई छिटो, भरपर्दो र ग्राहक-मैत्री सेवा प्रदान गर्ने लक्ष्य राखेको छ।

सेन्टरमा दक्ष प्राविधिक टोली, आधुनिक डाइग्नोस्टिक (परीक्षण) सुविधा र गुणस्तरीय स्पेयर पार्ट्सको पूर्ण व्यवस्था गरिएको छ। जसले गर्दा ग्राहकहरूले उच्चस्तरीय सेवाको अनुभव गर्न पाउनेछन्। यहाँबाट ग्राहकहरूले डिभाइसको विस्तृत जाँच, सफ्टवेयर सपोर्ट, वारेन्टी सेवा, नियमित मर्मतसम्भार तथा प्राविधिक परामर्शजस्ता सुविधाहरू प्राप्त गर्न सक्नेछन्।

नयाँ सर्भिस सेन्टर उद्घाटनको अवसरमा बोल्दै टेलिटक प्रालिका कार्यकारी निर्देशक सञ्जय अग्रवालले ग्राहकलाई पारदर्शी र विश्वसनीय सेवा प्रदान गर्नु कम्पनीको प्रमुख प्राथमिकता रहेको बताउनुभयो। “नेपालमा पोको ब्रान्डको सेवा पहुँचलाई अझ विस्तार गर्दै ग्राहक सन्तुष्टिलाई उच्च बिन्दुमा पुर्‍याउन हामी प्रतिबद्ध छौँ,” उहाँले भन्नुभयो।

यस नयाँ केन्द्रको स्थापनासँगै पोकोका प्रयोगकर्ताहरूले अब अझै झन्झटरहित र व्यावसायिक सेवा प्राप्त गर्ने अपेक्षा गरिएको छ।