चितवन । राप्ती नदीमा पाइने दुर्लभ घडियाल गोहीका गुँड (nest) खोज्ने अभियान सुरु गरिएको छ। चितवन राष्ट्रिय निकुञ्जले हरेक वर्षझैँ यस वर्ष पनि चैत र वैशाख महिनामा गुँड खोजी अभियान सञ्चालन गरेको हो।

निकुञ्जका सूचना अधिकारी अविनास थापा मगरका अनुसार चैत १ गतेदेखि सुरु गरिएको गुँड खोजी कार्य वैशाख १० गतेसम्म निरन्तर सञ्चालन हुनेछ। यस अभियानका लागि बोटे समुदायका दुई जनालाई परिचालन गरिएको उनले जानकारी दिए।

हाल नदी किनारमा रहेका सम्भावित स्थानहरूमा गुँड पहिचान गर्ने काम भइरहेको छ। गुँड पहिचान भएपछि निकुञ्जका कर्मचारीहरू पुनः खटाइने छन् र अण्डा सङ्कलन प्रक्रिया सुरु गरिनेछ।

सङ्कलित अण्डाहरूलाई निकुञ्जभित्र रहेको गोही प्रजनन केन्द्रमा ल्याएर सुरक्षित रूपमा कोरल्ने (ह्याचिङ) प्रक्रिया अघि बढाइने छ। यसबाट घडियाल गोहीको संरक्षण र संख्या वृद्धि गर्न सहयोग पुग्ने विश्वास गरिएको छ।

अघिल्ला वर्षहरूमा राप्ती नदी र नारायणी नदी दुवै क्षेत्रमा गुँड खोजी गरिँदै आएको भए पनि यस वर्ष भने राप्ती नदीमा मात्रै खोजी अभियान केन्द्रित गरिएको निकुञ्जले जनाएको छ। घडियाल गोही नेपालका अति संकटापन्न जीवमध्ये एक मानिन्छन्, र तिनको संरक्षणका लागि यस्ता गतिविधि महत्वपूर्ण मानिन्छन्। रासस