काठमाडौं । Nepal Insurance Authority ले सबै इजाजतपत्रप्राप्त बीमा कम्पनीहरूलाई ई–बिलिङ प्रणाली अनिवार्य रूपमा लागू गर्न निर्देशन दिएको छ। प्राधिकरणले जारी गरेको परिपत्रमार्फत बीमा कम्पनीहरूलाई यस्तो व्यवस्था तत्काल कार्यान्वयनमा ल्याउन आग्रह गरिएको हो।

प्राधिकरणका अनुसार बीमा क्षेत्रमा वित्तीय अनुशासन सुदृढ गर्ने, कारोबारमा पारदर्शिता बढाउने, कर अनुपालन सुनिश्चित गर्ने तथा सेवा प्रवाहलाई प्रविधिमैत्री बनाउने उद्देश्यले ई–बिलिङ प्रणाली अनिवार्य गरिएको हो।

निर्देशनअनुसार अब सबै बीमा कम्पनीहरूले बीमाशुल्क, सेवा शुल्क तथा अन्य सबै प्रकारका भुक्तानीका लागि अनिवार्य रूपमा ई–बिल वा इनभ्वाइस जारी गर्नुपर्नेछ। यसले नगद तथा कागजी प्रक्रियामा आधारित कारोबारलाई क्रमशः डिजिटल प्रणालीतर्फ रूपान्तरण गर्ने अपेक्षा गरिएको प्राधिकरणले जनाएको छ। प्राधिकरणले तोकिएको मापदण्डअनुसार प्रणाली कार्यान्वयन नगर्ने कम्पनीमाथि आवश्यक कारबाही हुन सक्ने संकेत समेत दिएको छ।