काठमाडौं ।  नेपालमा अहिले रासायनिक मलको अवस्था र आपूर्तिका विषयमा कृषि, वन तथा पर्यावरण मन्त्री गिता चौधरीले प्रतिनिधिसभामा महत्त्वपूर्ण जानकारी गराउनुभएको छ। उहाँले दिनुभएको विवरण अनुसार अहिले देशमा मलको अवस्था सन्तोषजनक छ।

चालु आर्थिक वर्षमा सरकारले किसानलाई करिब ६ लाख मेट्रिक टन अनुदानको मल उपलब्ध गराउने लक्ष्य राखेको थियो। मन्त्री चौधरीका अनुसार, त्यसमध्ये अहिलेसम्म ५ लाख ५४ हजार ७६२ मेट्रिक टन मल देशमा भित्रिइसकेको छ। यसरी आएको मलमध्ये ४ लाख ६३ हजार १०७ मेट्रिक टन मल किसानहरूको हातमा पुगिसकेको छ।

अहिले देशका विभिन्न गोदामहरूमा राखिएको, नेपाल भित्रिसकेको र विवरण दर्ता हुन बाँकी रहेको सबै जोड्दा जम्मा १ लाख ४४ हजार ५८५ मेट्रिक टन मल मौज्दात (स्टक) रहेको छ।

मल ल्याउने क्रममा केही बाह्य चुनौतीहरू पनि सामना गर्नुपरेको मन्त्रीले बताउनुभयो। विशेषगरी मध्यपूर्वमा चलिरहेको युद्ध र तनावका कारण सम्झौता भएको करिब १ लाख ८७ हजार मेट्रिक टन मल भने समयमै आउन सकेको छैन।

यस अभावलाई कम गर्न र किसानलाई मर्का पर्न नदिन सरकारले विकल्प खोजेको छ। भारत सरकारसँग सोझै सम्झौता (जिटुजी) गरेर थप ५० हजार मेट्रिक टन मल ल्याउने प्रक्रिया अघि बढाइएको छ र यसका लागि मन्त्रिपरिषद्ले समेत स्वीकृति दिइसकेको मन्त्री चौधरीले स्पष्ट पार्नुभएको छ।