अमेरिकी राष्ट्रपति डोनाल्ड ट्रम्पले इरानले युद्धविरामको उल्लङ्घन गरेको गम्भीर आरोप लगाउँदै कडा चेतावनी दिएका छन् । सामाजिक सञ्जाल ‘ट्रुथ सोसल’ मार्फत आफ्नो धारणा सार्वजनिक गर्दै उनले अमेरिकालाई पुनः सैन्य कारबाहीमा उत्रिन बाध्य पारिएमा इस्लामिक गणतन्त्र इरानको अस्तित्व नै समाप्त हुने जिकिर गरेका छन् । इरानी मिसाइल, ड्रोन भण्डारण र तटीय राडार प्रणालीमाथि अमेरिकी सेनाले गरेको आक्रमणको पुष्टि गर्दै ट्रम्पले यस्तो आक्रामक प्रतिक्रिया जनाएका हुन् ।

यसैबीच, अमेरिकी केन्द्रीय कमान्ड (सेन्टकम) ले शनिबार इरानका विभिन्न सैन्य पूर्वाधारहरूमा शृङ्खलाबद्ध आक्रमण गरेको छ । पनामाको झन्डा फहराउँदै करिब २० लाख ब्यारेल कच्चा तेल बोकेर हिँडेको ‘किकु’ नामक ट्याङ्करमाथि इरानले ड्रोन आक्रमण गरेपछि त्यसको कडा जवाफस्वरूप अमेरिकाले यो कदम चालेको हो । अमेरिकी सेनाका अनुसार उक्त कारबाहीमा इरानका निगरानी तथा सञ्चार प्रणाली, हवाई प्रतिरक्षा संयन्त्र, ड्रोन भण्डारण कक्ष र बारुद बिछ्याउने संरचनाहरूलाई मुख्य निशाना बनाइएको थियो ।

दक्षिणी इरानको सिरिक र केश्म क्षेत्रमा शक्तिशाली विस्फोटहरू भएको त्यहाँका स्थानीय सञ्चारमाध्यमहरूले पुष्टि गरेका छन् । यसअघि शुक्रबार मात्रै पनि ‘एभर लभ्ली’ नामक पानीजहाजमाथि भएको आक्रमणको बदलास्वरूप अमेरिकाले इरानमाथि सैन्य प्रहार गरेको थियो । यता, इरानले पनि खाडी क्षेत्रमा रहेका अमेरिकी अखडाहरूमा आफूले जवाफी हमला गरेको दाबी गर्दै आएको छ । इरानको इस्लामिक रिभोलुसनरी गार्ड्स (आईआरजीसी) ले अमेरिकाले फेरि आक्रमण गरे त्यसको प्रतिवाद अझ भयानक र व्यापक हुने चेतावनी दिएको छ ।

मध्यपूर्वको यो बढ्दो तनावमा अन्य राष्ट्रहरू पनि प्रत्यक्ष रूपमा जोडिन थालेका छन् । शनिबार बिहान बहराइनले आफूमाथि इरानी ड्रोन लक्षित भएको भन्दै तेहरानले क्षेत्रीय शान्तिको प्रयासलाई खलबलाउन खोजेको गम्भीर आरोप लगाएको छ । अर्कोतर्फ, इजरायलले लेबनानमाथिको आफ्नो हवाई आक्रमणलाई निरन्तरता दिइरहेको छ भने हिज्बुल्लाहका नेता नाइम कासेमले युद्धविरामसम्बन्धी कुनै पनि सम्झौतालाई सीधै अस्वीकार गरेका छन् । यी समग्र घटनाक्रमले मध्यपूर्वको सङ्कट तत्काल समाधान हुने सम्भावनालाई क्षीण बनाउँदै क्षेत्रीय तनाव अझै चुलिने स्पष्ट सङ्केत गरेका छन् ।