काठमाडौं । ‘स्वस्थ मुख, स्वस्थ जीवन’ भन्ने नारासहित आज विश्वभर विश्व मुख स्वास्थ्य दिवस विभिन्न सचेतनामूलक कार्यक्रमका साथ मनाइँदैछ। यस दिवसले मुख तथा दन्त स्वास्थ्यप्रति जनचेतना अभिवृद्धि गर्ने उद्देश्य राखेको छ।

दन्त चिकित्सक तथा स्वास्थ्य विज्ञहरूले नियमित रूपमा दाँतको हेरचाह गर्न आग्रह गरेका छन्। उनीहरूका अनुसार दिनमा कम्तीमा दुई पटक दाँत माझ्ने, समय–समयमा दन्त परीक्षण गराउने र अत्यधिक चिनी तथा प्रशोधित खाद्य पदार्थको सेवन घटाउने बानीले मुखसम्बन्धी रोगबाट बच्न मद्दत पुग्छ। मुखको स्वास्थ्य राम्रो भएमा समग्र शारीरिक स्वास्थ्य पनि सुदृढ रहने उनीहरूको भनाइ छ।

यस अवसरमा नेपालमा स्वास्थ्य तथा जनसंख्या मन्त्रालय, दन्त चिकित्सक सङ्घ तथा विभिन्न संघ–संस्थाले दन्त स्वास्थ्य शिविर, जनचेतनामूलक कार्यक्रम र कार्यशाला सञ्चालन गरिरहेका छन्। विशेषगरी विद्यालय र समुदाय स्तरमा कार्यक्रममार्फत मुख स्वास्थ्यसम्बन्धी जानकारी दिइँदैछ।

सन् २०१३ देखि प्रत्येक वर्ष मार्च २० मा मनाइँदै आएको यो दिवसले मुखसम्बन्धी रोगको रोकथाम, समयमै उपचार तथा व्यक्तिगत सरसफाइमा ध्यान दिन प्रेरित गर्दै आएको छ।